

D2916

།བགེགས་འདུལ་ཁྲོ་རྒྱལ་གཙོ་ལ་ཕྱག་འཚལ་ལོ། །དཔལ་རྡོ་རྗེ་རྣམ་པར་འཇོམས་པ་ལ་བསྟོད་པ་སློབ་དཔོན་བྲམ་ཟེ་མ་ཎི་བཛྲས་མཛད་པ་རྫོགས་སོ།། །།པཎྚི་ཏ་བཛྲ་ཤྲཱི་དང་ལོ་ཙཱ་བ་རབ་ཞི་བཤེས་གཉེན་གྱིས་བསྒྱུར་བའོ།།[་]@##། །རྒྱ་གར་སྐད་ དུ།བཛྲ་བི་དཱ་ར་ཎ་ཀ་ལ་ཤ་བི་དྷིཿ། བོད་སྐད་དུ། རྡོ་རྗེ་རྣམ་པར་འཇོམས་པའི་བུམ་པའི་ཆོ་ག་།རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །ཡིད་དུ་འོང་བའི་ས་ཡི་ཆར། །ཀུན་དུ་སྤྱོད་པ་གཙང་ལྡན་པས། །གསེར་རམ་དངུལ་ལམ་ཁམས་གཞན་གྱིས། །བུམ་པ་མཚན་ཉིད་བཟང་ལྡན་པ། ། ལེགས་བཀྲུས་དཀར་པོའི་རྫས་ཀྱིས་བྱུགས། །དྲིས་བདུག་རས་ཀྱིས་མགུལ་པ་དཀྲིས། །མེ་ཏོག་སྲད་བུས་མཛེས་བྱས་པར། །རིན་ཆེན་རྨ་མེད་ཙནྡན་དྲི། །རྒྱུན་འབབ་ཆུ་ཡིས་ལེགས་བཀང་བ། །བཟང་པོའི་ཤིང་གིས་ཁ་བརྒྱན་ཏེ། །ས་དང་ལྕི་བར་བསྲེས་པ་ཡི། །དཀྱིལ་འཁོར་འདབ་བརྒྱད པད་དབུས་སུ།།དཱུར་བའི་སྟན་ལ་ཡང་དག་གཞག་།དྲི་ཞིམ་ཆུ་ཡིས་བཀང་བའི་སྣོད། །རྡོ་རྗེ་མེ་ཏོག་ཕྲེང་བར་ལྡན། །རང་ལྷའི་བསམ་གཏན་ལ་གཞོལ་བས། །སྟོང་པའི་སྔགས་ཀྱིས་རྣམ་སྦྱངས་ཏེ། །བྷཱུཾ་ལས་རིན་ཆེན་གཞལ་ཡས་ཁང་། །བཾ་བྱུང་འོ་མའི་རྒྱ་མཚོར་ལྡན། །པཾ་པད་ཨ་ལས་ཟླ་ དཀྱིལ་འཁོར།།དེར་གནས་ཧཱུཾ་ཡིག་སྤྲོ་བསྡུ་ལས། །ཁྲོ་བོ་ཁྲོ་མོའི་འཁོར་ལོ་བསྐྱེད། །ཡེ་ཤེས་སྤྱན་དྲངས་མཆོད་པ་དང་། །བསྟོད་དང་གཉིས་སུ་མེད་པར་བྱ། །དབང་བསྐུར་སླར་ཡང་མཆོད་བསྟོད་ནས། །རང་སྙིང་སྔགས་ཀྱི་ཕྲེང་བཀོད་དེ། །བཟླས་དང་བུམ་པར་སྤྲོ་བྱ་བར། །ལན་གྲངས་ཉི་ཤུ་ རྩ་གཅིག་གམ།།ཡང་ན་བརྒྱ་རྩ་བརྒྱད་ལ་སོགས། །ཇི་སྲིད་མངོན་པར་འདོད་པའི་མཐར། །མཆོད་བསྟོད་འདོད་དོན་གསོལ་བ་དང་། །ལྷ་རྣམས་ཡེ་ཤེས་བདུད་རྩི་ཡིས། །རབ་བཀྲུས་གཙང་མར་གྱུར་པ་དང་། །ནད་མེད་བགེགས་རྣམས་འཇོམས་པ་དང་། །དཔལ་དུ་བྱེད་ཅིང་བཀྲ་ཤིས་དང་། །ཕུན་ ་སུམ་ཚོགས་མིན་འཇོམས་པར་བྱེད།